Welcome to the website of SAH Afurðir ehf. This website is provided for in Icelandic, German and English, reflecting the reach of our business relationships. For information in your language use the language buttons provided for above.

Fréttir

Mjög mikil nautgripaslátrun hefur verið í haust hjá SAH Afurðum. Sem dæmi má nefna að í nóvember mánuði var slátrað samtals 217 nautgripum. Er það með almesta móti. Mikil slátrun hefur einnig verið nú í desember og ljóst að nautgripaslátrun hjá félaginu á yfirstandandi ári verður sú mesta sem verið hefur í nokkuð mörg ár. Ungneyti eru þó heldur léttari en verið hefur og einnig heldur yngri. Ljóst má vera að til að nautakjötsframleiðslan nái að standa undir þörfum innanlandsmarkaðar þarf að koma til aukin framleiðsla, hvort heldur sem það verður gert með fjölgun gripa eða sem hlýtur að teljast spennandi valkostur, með innflutningi annars kúakyns. Það þyrfti þá að vera kúakyn sem hentaði til kjötframleiðslu.

Sala nautgripakjöts hefur gengið ágætlega og eru bændur hvattir til að hafa samband hafi þeir gripi til slátrunar.

Sig. Jóh.

Starfsfólk SAH Afurða sendir viðskiptavinum sínum nær og fjær innilegar jólakveðjur. Bestu óskir um farsælt komandi ár, með þökk fyrir viðskiptin á liðnum árum.

Sig. Jóh.

Sauðfé verður slátrað hjá SAH Afurðum þriðjudaginn 29. nóvember. Bændur eru hvattir til að hafa samband við sláturhússtjóra sem fyrst.

Sig. Jóh.

Sauðfjárslátrun hjá SAH Afurðum lauk þetta haustið í dag á hádegi. Aldrei fyrr hefur jafnmörgu fé verið slátrað hjá félaginu á einu ári, og er heildarslátrun haustsins komin í um 106.300 fjár. Meðalvigt endaði rétt neðan við 16 kg. sem er svipað og í fyrra.

Seinna í nóvember verður auglýstur sláturdagur og eru bændur hvattir til að hafa samband við sláturhússtjóra hafi þeir þá heimt fé sem þarf að færa til slátrunar.

Sig. Jóh.

Sá áfangi náðist hjá SAH Afurðum í dag að slátrun sauðfjár fór í fyrsta skipti yfir 100.000 fjár. Enn er eitthvað eftir og unnið verður á fullum afköstum fram á föstudag þegar slátrun lýkur. Þetta er merkur áfangi í sögu félagsins, en það hefur verið ljóst í nokkurn tíma að til þessa kæmi. Gripur númer 100.000 reyndist vera hinn vænsti dilkur frá Jóni Inga í Fagranesi.

Þessi árangur væri ekki mögulegur nema með samstilltu átaki einstaklega öflugs starfsfólks, sem lagt hefur mjög hart að sér til að þessi áfangi næðist. Flestir starfsmenn hafa starfað fyrir félagið í margar vertíðir og því öllum hnútum kunnugir. Brátt hverfa flestir erlendir starfsmenn til síns heima og þökkum við þeim kærlega fyrir samstarfið þetta haustið og vonumst til að sjá sem flesta að ári liðnu.

Sig. Jóh.

Í gær þann 23. september var mesti vænleiki innlagðra dilka hjá SAH Afurðum sem um getur. Meðalfallþungi dilka var 18.86 kg. sem er það langmesta sem elstu menn muna, og ekki eru til skýrslur um meiri fallþunga á einstökum degi í sögu félagsins. Þetta er athyglisvert ekki síst í ljósi erfiðrar veðráttu í vor, en það virðist ekki koma niður á vænleika. Flestir dilkana voru úr Hörgárdal og af Ströndum.

Sig. Jóh.

Sauðfjárslátrun hjá SAH Afurðum er nú í fullum gangi og gengur verkið mjög vel fyrir sig. Samhent lið fólks vinnur við slátrunina og hefur verkun og frágangur kjötsins sennilega sjaldan verið betri. Gallatíðni er með alminnsta móti og verkun á allan hátt til fyrirmyndar.
Mikil áhersla er lögð á nýtingu aukaafurða og er svo komið að nánast allt er hirt sem hægt er að hirða. Unnið er að verkefni um tilraunavinnslu á löppum og hausum fyrir afríkumarkað. Nokkuð mikið þróunarstarf er þar fyrir höndum en mikilvægt er að unnt verði að finna leiðir til að nýta þessa skrokkhluta til fulls á komandi árum. Þrátt fyrir kalt vor eru dilkar með allra vænsta móti og því ljóst að innvegið kjötmagn verður líklega allnokkuð meira en verið hefur undanfarin ár.

Sig. Jóh.

Ákveðið hefur verið að verð á folaldakjöti verði 385 kr.kg. nú í september og október. Þetta er mikil verðhækkun frá síðasta ári og alls óvíst um hvernig kjötmarkaðurinn muni taka við þessari verðhækkun. Því er ekki hægt að gefa út verð fyrir allt haustið að sinni.

Sig. Jóh.

Í kjöfar verðbreytinga á dilkakjötsmarkaði hefur stjórn SAH Afurða tekið ákvörðun um að hækka verð til bænda sbr. meðfylgjandi verðskrá. Sjá einnig undir "afurðaverð" hér á síðunni.

Sig. Jóh.

Á sameiginlegum stjórnarfundi SAH Afurða ehf. og SAH svf. sem haldinn var þann 10. ágúst var verð dilkakjöts og ærkjöts til bænda ákveðið. Um verulega hækkun er að ræða frá fyrra ári. Umtalsverðar álagsgreiðslur eru í ágúst og byrjun september. Auk álagsgreiðslna SAH Afurða ehf. greiðir Markaðsráð kindakjöts, 2000 kr. á dilk í viku 33, 1.500 kr. á dilk í viku 34 og 500 kr. á dilk í viku 35.

Fréttabréf verður sent út í næstu viku þar sem gerð verður frekari grein fyrir undirbúningi sláturtíðar.

Sig. Jóh.

Boðið verður uppá sumarslátrun sauðfjár hjá SAH Afurðum ehf. frá og með 15. ágúst. Bændur eru hvattir til að hafa samband við sláturhússtjóra. Fjöldi sláturdaga í hverri viku í ágúst ræðst af eftirspurn.

Álagsgreiðslur eru eftirfarandi:

	SAH Afurðir ehf.	Markaðsráð kindakjöts
Vika 33	15% á haustverð	2.000 kr. á dilk
Vika 34	15% á haustverð	1.500 kr. á dilk
Vika 35	15% á haustverð	500 kr. á dilk

Haustverð verður gefið út á næstu dögum, en það verður að fullu samkeppnisfært við verð annarra sláturleyfishafa.

Sig. Jóh.

SAH Afurðir hafa fyrir nokkru hækkað verð fyrir fullorðin hross í 150 kr.kg. Þeir sem hafa hug á að slátra fullorðnum hrossum á næstunni eru beðnir um að hafa samband við sláturhússtjóra.

Sig. Jóh.

SAH Afuðir ehf. hafa nú hækkað nautgripakjöt til bænda. Nánari upplýsingar má sjá hér á síðunni. Eftir þessa hækkun eru viðskiptakjör SAH Afurða ehf. enn sem fyrr sambærileg og annarra stærri sláturleyfishafa.

Sig. Jóh.

Þeir innleggjendur sem hafa hug á að fá sendan ársreikning SAH Afurða ehf. eru hvattir til að senda póst á sigurdur@sahun.is og verður reikningurinn þá sendur í pósti. Einnig er hægt að nálgast reikninginn á skrifstofu félagsins.

Sig. Jóh.

Stjórnir SAH Afurða ehf. og SAH Svf. ákváðu á fundi sínum í gær að greiða 9 kr.kg. uppbót á innlagt dilkakjöt í haustslátrun 2010. Uppbótin verður reikningsfærð og greidd út til bænda á næstu dögum. Bætt afkoma af útflutningi dilkakjöts gerir þessa greiðslu mögulega.

Sig. Jóh.

Aðalfundur SAH Afurða ehf. og Sölufélags Austur Húnvetninga svf. fór fram í húsum félagsins þann 6. apríl. Fundarstörf voru samkvæmt samþykktum félaganna.

Fram kom að velta SAH Afurða var um 1.570 m.kr. á liðnu ári. Hagnaður fyrir fjármagnsliði nam tæpum 64 m.kr. Eftir fjármagnsliði var hagnaður félagsins 27.7 m.kr. sem er umtalsverður rekstrarbati frá fyrra ári.

Baldvin Sveinsson lét af störfum sem formaður stjórnar SAH svf. og var Björn Magnússon frá Hólabaki, kosinn formaður í hans stað. Gegnir hann jafnframt stjórnarformennsku í SAH Afurðum.

Baldvini voru þökkuð góð störf í þágu félagsins og Björn boðinn velkominn til starfa.

Ekki urðu aðrar breytingar á stjórnum félaganna.

Sig. Jóh.

Páskaslátrun sauðfjár fór fram í dag, 5. apríl. Slátrað var um 300 fjár og var flokkun góð og dilkar ágætlega vænir. Aðalfundur SAH Afurða ehf. og SAH svf. verður haldinn í starfsmannahúsi félagsins að Húnabraut 37, á morgun 6. april kl. 13:30. Dagskrá er samkvæmt samþykktum félaganna.

Sig. Jóh.

Fram til 1. ágúst nk. verður skrifstofa SAH Afurða ehf. opin frá 8 - 16 mánudaga til fimmtudaga, og 8 - 12 á föstudögum.

Sig. Jóh.

SAH Afurðir hafa hækkað verð á hrossakjöti, og eru nú greiddar 135 kr. kg. fyrir HR1A. Verð SAH Afurða hefur því hækkað umtalsvert. Bændur eru hvattir til að hafa samband við sláturhússtjóra og panta slátrun hafi þeir hross til slátrunar.

Sig. Jóh.

Páskaslátrun sauðfjár verður þann 5. apríl nk. Bændur eru hvattir til að hafa samband við sláturhússtjóra í síma 8962280. Aðeins er stefnt að þessum eina sláturdegi. Athygli er vakin á að samkvæmt nýrri reglugerð verða hrútlömb að vera gelt til að teljast til lamba. Verð til bænda er hækkað til muna frá haustverði, en verðskrá má bæði sjá hér að neðan og svo undir flipa um afurðaverð hér á síðunni.

Sig. Jóh.

SAH Afurðir ehf. hækka verð fyrir FO1 A í 290 kr.kg. frá og með 15. febrúar að telja. Aðrir flokkar folaldakjöts hækka samhliða. Flutningskostnaður er óbreyttur, 1.000 kr. á hvert folald. Einnig er bændum velkomið að koma sjálfir með sláturgripi.

Sig. Jóh.

Vegna umræðna um dioxin mengun í kjöti þá skal það tekið fram að SAH Afurðir hafa ekki tekið til slátrunar sauðfé eða nautgripi frá umræddum bæ í Skutulsfirði. Þarna er um að ræða sorglegt tilfelli, þar sem kæruleysi og getuleysi viðkomandi yfirvalda hefur leitt til stórtjóns fyrir alla hlutaðeigandi.

Sig. Jóh.

Mikill skortur er nú á nautgripakjöti og hefur verð farið hækkandi. SAH Afurðir hækka verð til bænda verulega frá og með deginum í dag að telja. Bændur eru hvattir til að gera verðsamanburð og kanna kjör félagsins.

Upplýsingar um afurðaverð SAH Afurða má nálgast hér á síðunni.

Sig. Jóh.

Starfsmenn SAH Afurða óska viðskiptavinum og landsmönnum öllum gleðilegra jóla og farsældar á komandi ári.

Lokað verður eftir hádegi á Þorláksmessu, allan aðfangadag og allan gamlársdag.

Nú sem undanfarin ár bjóða SAH Afurðir uppá jólakörfur fullar af ýmiskonar góðgæti og húnvetnskri framleiðslu.
Kíkið á úrvalið með því að smella hér.

Sig. Jóh.

Sauðfé verður slátrað þann 24. nóvember hjá SAH Afurðum. Bændur eru hvattir til að hafa samband við sláturhússtjóra og gefa upp áætlaðan sláturfjárfjölda. Sama verð og greiðslukjör verða í boði og fyrir haustslátrun 2010.

Sig. Jóh.

Í nýliðinni sláturtíð var sett nýtt met í sauðfjárslátrun hjá SAH Afurðum á Blönduósi. Slátrað var 94.341 fjár og hefur aldrei í sögu slátrunar á Blönduósi verið slátrað fleira sauðfé. Meðalvigt var einnig með mesta móti eða um 16,08 kg sem er nokkru þyngra en í fyrra. Sláturtíðin var einnig styttri en verið hefur í mörg ár, og voru sláturdagar aðeins 40. Mjög samhent lið fólks stóð að slátruninni og allri vinnu í sláturhúsinu, en nú eru flestir hinna erlendu starfsmanna farnir til síns heima.

Sala hefur gengið ágætlega og búið er að flytja um 140 tonn af kjöti á erlenda markaði í september og október, þrátt fyrir afar takmarkaðan evrópukvóta. Vonir standa til að hægt verði að auka útflutning í byrjun næsta árs.

Allar garnir og vambir voru fluttar til Húsavíkur til vinnslu hjá Icelandic Byproducts, en það er fyrirtæki sem SAH Afurðir og Norðlenska eiga að jöfnu. Tilgangur þess félags er fyrst og fremst að auka verðmæti aukaafurða, og stuðla þannig að hækkuðu kjötverði til bænda.

Sig. Jóh.

Nú líður senn að lokum sláturtíðar. Reiknað er með að sauðfjárslátrun ljúki föstudaginn 29. október. Allt útlit er fyrir að fjöldi sláturfjár verði svipaður og í fyrra, eða jafnvel ívið meiri um 93 - 94 þúsund fjár. Vertíðin hefur gengið mjög vel, og má þakka það samhentu starfsfólki, sem hefur lagst á eitt með að láta allt ganga eins og best verður á kosið.

Folaldaslátrun er að fara í fullan gang og eru bændur hvattir til að hafa samband við sláturhússtjóra til að skrá folöld og fullorðin hross.

Sig. Jóh.

Sauðfjárslátrun gengur mjög vel hjá SAH Afurðum ehf. Í lok þessarar viku verður búið að slátra ríflega 40.000 fjár og fram að þessu er meðalfallþungi dilka nokkru meiri en í fyrra, eða um 16.4 kg. Eina fimm daga hefur meðalfallþungi farið yfir 17 kg sem er einstakt í sögu sauðfjárslátrunar á Blönduósi. Góð tíð auðveldar mjög flutninga og hafa þeir gengið mjög vel.

Mikil áhersla er lögð á nýtingu aukaafurða og hefur sú vinnsla aukist mjög frá því sem áður var. Stefnt er að því að næsta haust verði nærfellt allt hirt úr lambinu sem hægt er að hirða, annaðhvort til matar eða til framleiðslu gæludýrafóðurs. Búið er að ganga frá sölu á flestöllum gærum og horfur í útflutningi dilkakjöts eru ágætar, þótt takmarkaður ESB kvóti takmarki nokkuð hversu mikið hægt er að flytja á Evrópska markaði nú til áramóta.

Útflutningur á fersku kjöti til Þýskalands er hafinn að nýju og fara nú sendingar nærfellt vikulega, sem enda á borðum þýskra matgæðinga, en kjötið fer fyrst og fremst til veitingahúsa sem leggja mikinn metnað í nýjungar og að hafa góða og áhugaverða matseðla. Vonir standa til að framhald verði á þessum útflutningi.

Sig. Jóh.

Nú er búið að slátra tæplega 20.000 fjár hjá SAH Afurðum á þessu hausti. Flutningar og slátrun gengur vel, enda tíðarfar verið mjög hagstætt. Síðastliðinn föstudag, féll húsmetið í meðalþyngd dilka, en þann dag var slátrað 2440 dilkum og var meðalvigt þeirra 17,35 kg. Aldrei fyrr í sögu hússins hefur önnur eins meðalvigt sést. Greinilegt er að dilkar eru vænir, án þess þó að vera feitir og er það mikið ánægjuefni. Búist er við að heildarslátrun haustsins fari í um 90.000 fjár.

Sala afurða gengur ágætlega, og er ástæða til að minna á að slátursala félagsins er opin alla virka daga.

Sig. Jóh.

Í dag fengu SAH Afurðir ehf. staðfest að sauðfjárslátrun félagsins uppfyllir kröfur til HalAl slátrunar. Það voru fulltrúar Menningarseturs Múslima á Íslandi sem tóku slátrunina út og voru mjög sáttir við sláturaðferðir og verkun kjötsins. Með þessari vottun opnast möguleikar til sóknar á mörkuðum sem gera kröfur um HalAl vottun, en hún felur í sér að kjötið telst hæft til neyslu fyrir múslima. Í engu er hvikað frá reglugerðum um dýravelferð, heilbrigði né góða framleiðsluhætti. Sáralítill munur er á þeim aðferðum sem nú eru notaðar og þeim sem áður voru notaðar, annar en sá að þeir sem sjá um blóðgun, eru múslimskrar trúar.

Vonir standa til að unnt verði að sækja á nýja markaði með þetta vottorð í farteskinu, en auk þessarar vottunar fengu SAH Afurðir nýlega leyfi til útflutnings dilkakjöts og hrossakjöts á Rússlandsmarkað. Þegar hefur verið samið við Rússneska kaupendur um útfluting á allt að 40 tonnum af ærkjöti til Rússlands.

Sig. Jóh.

Tekin hefur verið ákvörðun um breytingu verðskrár sauðfjárafurða. Er þetta gert í ljósi þess að kjör félagsins voru orðin nokkuð lakari heldur en annarra stærri sláturleyfishafa. Einnig er hér brugðist við þeirri gagnrýni bænda að þrepun verðs hafi verið seint fram komin og hún verið of mikil. Því er þrepun nú aðeins fyrstu þrjár vikur sláturtíðar. Í viku 36,37, og 38. Eftir það gildir eitt verð út sláturtímann og er það sama krónutala og í fyrra að frádregnu 39 kr. kg. geymslugjaldi, sem þó dregst ekki af fullorðnu fé.

Sem fyrr er val um staðgreiðslu á föstudegi eftir sláturviku, eða að fá 75% greitt þá og 25% 1. mars 2011. Þeir sem velja þann kost fá sem fyrr 4 kr.kg. álag greitt á öll innlögð kg. dilkakjöts og ærkjöts.

Það er von stjórnenda og starfsmanna SAH Afurða að með þessu sé komið verulega til móts við óskir bænda.

Sig. Jóh.

Þann 13. ágúst ákvað stjórn félagsins verð fyrir sauðfjárafurðir. Niðurstaðan varð að greiða sama verð og á síðastliðnu ári, að frádregnu geymslugjaldi að upphæð 39 kr. Einnig var ákveðið að hafa verð nokkuð mismunandi eftir vikum og er það hæst í upphafi sláturtíðar, en fer svo lækkandi.

Ekki eru forsendur til verðhækkanna, þar sem verð á innanlandsmarkað hefur lækkað ef eitthvað er, og erlendir markaðir eru mjög ótryggir vegna mikillar gengisóvissu.

Til að koma á móts við heimavinnslu bænda var ákveðið að verð fyrir heimtöku verði kr. 2.500 + vsk á skrokk, og gildir það bæði fyrir fullorðið fé og dilka. Gjaldið innifelur frystingu, sögun og frágang, en ekki sendingarkostnað.

Ákveðið var að bjóða uppá tvo valkosti þegar að greiðslu afurða kemur. Í fyrsta lagi að hafa sama hátt á og veirð hefur, þ.e. 100% staðgreiðsla föstudag eftir innleggsviku. Í öðru lagi býðst innleggjendum 75% greiðsla á föstudegi eftir innleggsviku og að fá 25% þann 1. mars 2010. Þeir sem velja þennan kost fá greitt álag á allt innleggið, og verður það kynntí fréttabréfi sem kemur út í næstu viku.

Sig. Jóh.

SAH Afurðir hafa hækkað verð á nautgripakjöti. Verð það sem félagið greiðir er nú að nýju fullkomlega samkeppnisfært við það besta sem býðst á þessum markaði. Nautgripakjöt hefur ekki hækkað síðan í mars 2008 og má því segja að mikil þörf hafi verið komin á hækkun til bænda.
Bændur eru hvattir til að skoða nýjan verðlista hér á síðunni.

Sig. Jóh.

Páskaslátrun sauðfjár verður 25. mars næstkomandi. Þeir sem vilja nýta sér hana eru beðnir um að hafa samband við sláturhússtjóra í síma 8962280. Uppgjör verður einni viku eftir sláturdag.

Sig. Jóh.

SAH Afurðir ehf. fluttu út tæplega 1.100 tonn af ýmsum afurðum á síðasta ári, en það samsvarar um 60 stórum flutningagámum. Stór hluti þess eða um 500 tonn eru sauðfjárgærur og stórgripahúðir, en því næst er um að ræða kjöt og kjötvörur og innmat ýmiskonar. Sú ánægjulega þróun hefur orðið að sífellt stærri hluti sláturdýra er nú nýttur til manneldis eða dýrafóðurs, í stað þess að umtalsverðum hluta innmatar var hent fyrir nokkrum misserum. Sem dæmi um vörur sem nú eru fluttar á erlenda markaði má nefna nýru, eistu, tittlinga af hrútum, bein og fitu. Áfram verður unnið að því að finna markaði fyrir fleiri vörur enda ljóst að til framtíðar verður að nýta alla hluti sláturdýra eins vel og kostur er. Vörurnar eru að fara til ýmissa landa, s.s. Kína, Danmerkur, Noregs, Færeyja og Bretlands.

Sig. Jóh.

Um nokkurt skeið hefur ekki verið innheimtur flutningskostnaður af stórgripum sem fluttir eru að sláturhúsi SAH Afurða úr Húnvatnssýslum og Skagafirði. Því miður verður ekki hjá því komist lengur að hefja gjaldtöku fyrir þennan flutning. Frá og með 17. janúar verður því sú breyting á að flutningskostnaður fyrir fullorðin hross, kýr og ungneyti verður kr. 2.000 á grip. Flutningskostnaður folalda verður kr. 1.500 á folald. Bændum verður velkomið að flytja gripi sjálfir til slátrunar og er þá flutningsgjald að sjálfsögðu ekki innheimt. Bændur eru vinsamlega beðnir um að koma gripum í sláturrétt fyrir kl. 16:00 daginn fyrir slátrun, nema að um annað sé samið við sláturhússtjóra.

Flutningsgjöld af öðrum svæðum hækka samsvarandi.

Sig. Jóh.

Starfsmenn SAH Afurða ehf. óska viðskiptavinum sínum fjær og nær gleðilegra jóla og farsældar á komandi ári. Þökkum viðskiptin á liðnum árum.

Starfsmenn SAH Afurða ehf.

Mikil sala hefur verið á hangikjöti frá SAH Afurðum undanfarnar vikur. Tugir tonna hafa selst, til hinna ýmsu kaupenda. Þess utan fara ófá hangilærin í jólagjarfir fyrirtækja og stofnana. Allt hangikjöt SAH er taðreykt, sem gefur kjötinu einstaklega milt og skemmtilegt bragð. Hangikjöt frá SAH verður hægt að fá í Samkaup á Blönduósi og Skagaströnd, og svo á föstudaginn 18. desember í slátursölu SAH Afurða.

Sig. Jóh.

Sauðfjárslátrun verður hjá SAH Afurðum þann 11. nóvember. Þeir sem hafa hug á að nýta þennan dag eru hvattir til að hafa samband við sláturhússtjóra sem fyrst í síma 8962280.

Sig. Jóh.

Haustslátrun sauðfjár hjá SAH Afurðum ehf. er nú lokið. Slátrað var rúmlega 91 þúsund fjár og var meðalvigt um 15.9 kg. Þetta er svipaður fjöldi og verið hefur undanfarin ár. Vertíðin gekk í alla staði mjög vel og stóðu starfsmenn sig með mikilli prýði. Tíðarfar var að mestu hagfellt þannig að flutningar gengu vel og engin áföll urðu í flutningum. Nú um helgina fækkar íbúum Blönduós um ríflega 60 þegar erlendir starfsmenn hverfa til síns heima eftir vel heppnaða dvöl hérna hjá okkur.

Sig. Jóh.

Nú er búið að slátra um 75 þúsund fjár hjá SAH Afurðum. Allt útlit er fyrir að heildarslátrun verði ríflega 90.000 fjár sem er svipað og á liðnu ári. Meðalvigt er um 16 kg. sem er nokkru betra en í fyrra.

Gert hefur verið átak í söfnun aukaafurða, t.d. fara öll lungu í fóðurstöð, einnig þær vambir sem ekki fara til manneldis. Allar hálsæðar fara sömuleiðis í fóðurstöð. Öll hjörtu, nýru, lifrar, eistu, þindar og tittlingar eru hirt, og er bæði selt hér innanlands en einnig til útflutnings. Urðun hefur því stórlega dregist saman.

Búið er að ganga frá sölu á öllum gærum og bendir allt til þess að þær verði allar farnar úr landi fyrir lok næsta mánaðar. Sala dilkakjöts er jöfn, þótt sala á erlenda markaði mætti gjarnan vera meiri.

Stefnt er að því að sauðfjárslátrun verði að mestu lokið þann 29. október nk.

Sig. Jóh.

Almennur heimtökukostnaður hjá SAH Afurðum ehf er 2.035 kr. á dilk og 2.260 kr á fullorðið fé. Sláturkostnaður á hvert kg. umfram 240 kg. er svo 190 kr.kg. Tekin hefur verið sú ákvörðun að þeir sem taka heim meira en 50 dilka fái afslátt frá þessu verði þannig að það verði 165 kr.kg. fyrir allt að 150 dilka. Hið sama gildir fyrir fullorðið fé.

Allar tölur eru án vsk.

Sig. Jóh.

Stjórnir SAH Afurða ehf. og SAH Svf. Gengu frá verðskrá fyrir sauðfjárafurðir á fundi sínum nú í morgun. Niðurstaða fundarins varð að það verð sem greitt var fyrir innanlandskjöt í fyrra haldi sér og verði greitt fyrir allt dilkakjöt á því verði. Þetta jafngildir ríflega 9% hækkun á verði til bænda.

Ærkjöt lækkar nokkuð í verði, enda hefur ærkjöt átt erfitt uppdráttar í samkeppni á kjötmarkaði undanfarna mánuði.

Innlegg verður greitt út á föstudegi eftir innleggsviku svo sem verið hefur undanfarin ár.

Heimtökukostnaður verður kr. 2.035 á dilk og kr. 2.260 á fullorðið fé. Báðar upphæðir eru án vsk.

Heimtökukostnaður á heimtöku umfram 240 kg. á lögbýli verður kr. 190 á kg. án vsk.

Bændur eru hvattir til að panta slátrun sem fyrst, því einhverjir sláturdagar eru að verða þéttsetnir.

Verðskráin er birt í töflunni hér fyrir neðan.

Öll verð eru án vsk. og er þetta birt með fyrirvara um prentvillur.

Sig. Jóh.

Verðskrá sauðfjárafurða hjá SAH Afurðum verður birt hér á vefnum þann 8. september næstkomandi. Verð sauðfjárafurða er háð stjórnarákvörðun og m.a. vegna gangna og réttarstarfa verður því miður ekki hægt að koma stjórnarfundi við fyrr en þennan dag. Innleggjendur eru beðnir velvirðingar á þeim óþægindum sem þetta kann að hafa í för með sér.

Sig. Jóh.

Yfirborgun SAH Afurða í viku 38 verður 35 kr.kg. og er því sambærileg og annarra stærri sláturleyfishafa.

Bændur eru hvattir til að panta slátrun sem fyrst.

Sig. Jóh.